أهالى قلعه الكبش مستمرين فى نضالهم ضد ظلم الحكومه و الناس دول بالرغم من شده فقرهم ألى ترتب عليه الجهل المزمن و مش ذنبهم أنهم أتولدو فى عشوائيات و المجارى ضربه فى العشش بتاعتهم مع كل ده الحكومه مسبتهمش فى حالهم مع أنهم مشتكوش من عيشتهم ألى الحيوانات فى المزارع عايشه أحسن منهم كل دول اطردو من العشش بتاعتهم ووصلو لدرجه أنهم مش عارفيين يعملو ايه يروحو مجلس الشعب يشتكو فيتسحلو من الأمن المركزى يروحو النائب العام يقدمو بلاغ يضربو من بلطجيه أمن الدوله و فرق الكاراتيه يعنى خلاص الناس ديه الدنيا أسودت معاهم و مبقتش تفرق معاهم النظام الفتره الجايه ديه هيواجه اكبر قوه معارضه القوه لا تيار أسلامى ولا تيار شيوعى و لا تيار ليبرالى القوه ديه هى مواطن عايز يعيش يورينى باه العادلى و الجيوش بتاعته هايعملو أيه قدام50 مليون مصرى عايش عيشه الحيوانات و بيحلم أنه يكون أنسان .
ده جزء من مظاهره أهالى قلعه الكبش أمام مكتب النائب العام الذين قامت الحكومه المصريه بطردهم من العشوائيات التى كانو يقيمون بها و وعدتهم بشقق و خالفت وعدها و تركتهم يسكنونون الشوارع فقام الأهالى بالتظاهر أمام النائب العام لتقديم مذكره ضد أحمد حملى المسؤل عن كشوف أهالى قلعه الكبش و فوجىء الأهالى بأن الحكومه تطلب منهم مبالغ نقديه ضخمه على سبيل الرشوه لتسكينهم فى شقق فى المدن الجديده المجوده بالصحراء
و ايضا السيده سوزان مبارك تدعى دائما أهتمامها بالسكن و تقوم بعمل دعايا كاذبه أمام منظمات حقوق الأنسان العالميه لكى تتلقى الدعم الذى لايعرف أحد أين يذهب أو كيف يتم أنفاقه
ألف ألف ألف مبروك لعريسنا مع أنها جت متأخره شويه و الله عارفيين أنك مكنتش فاضى لحوارات الجواز ديه كنت مشغول بحوار التوريث المهم أنا باباركلك بجد و الله بجد على جوازك بس هاقولك حاجه ياريت تنفض لحوار التوريث ده يا راجل خليك مركز فى بيتك رئاسه أيه و كلام فارغ أيه ده احنا حتى هانجبلك صداع لو بقيت رئيس علشان مش هانسكت لو العمليه رسيت عليك أرحب بيك كسياسى عادى بس مرحبش بيك كرئيس
ديجه أه . . مصر لالالالالالالالالا
بس أنا زعلان منك تخلى البلطجيه بتوعك يبوظلنا الفرح ألى كنا هانعملهولك فى طلعت حرب بجد أحنا زعلنا منك خالص يا راجل يا مفترى أكتر من خمس عربيات أمن مركزى و 3 عربيات ترحيلات متعبيه بأمناء شرطه علشان 20 أو 30 مدون هو ايه أنتو كنتو خايفيين نضرب نار فى الفرح ده أحنا منعرفش غير نكتب على الكيبورد و نمسك الماوس
ديجه أه . . مصر لالالالالالالالالا
من حقك تتجوز و تعيش حياتك . . بس مش من حقك توريثنا و تعيش علينا
ألى حصل فى الأستفتاء ده مصيبه و أنا بعترف أنى كنت متخلف لما كنت بدعو الناس تروح تصوت و تقول لا و بصراحه كده كل ألى كان بيدعو الناس أنهم يروحو ويقولو لا برده متخلفين زيى و تحيه لدعاه المقاطعه أنهم نجحوا مع أن الشعب المتخلف بتعنا مقاطع لوحده .
المصيبه ألى أكبر من التزوير أن التزوير كان علنى على عينك يا تاجر مش عارف هى الحكومه ديه أكيد متأكده من أننا كلنا متخلفين يعنى من الأخر هو كده و أعلى خيلكوا أركبوه يعنى من الأخر الشعب ده بأحزابه بجمعيات حقوق الأنسان بباقى البنى أدمين ميساووش تعريفه يعنى من الأخر أنتو ملكوش لزمه .
تخيلو مجرد تخيل مع أنى عارف أن الشعب ده خياله محدود أن موضوع التزوير ده حصل فى أى بلد غير مصر ألى أنتو متستحقوش تكونو منها المهم كان أيه ألى يحصل أكيد أقل حاجه كانت الحكومه كلها أستقالت بس هانقول ايه لشعب جبان زينا .
من الأخر كده المصرى بأه أرخص أنسان فى الوجود يعنى الواحد فينا بالتخلف و الجهل و السلبيه ألى أحنا فيها خلاص فينيتو ملناش لزمه المفروض نعمل أنتحار جماعى و نريح البشريه من الجهل و التخلف ألى أحنا فيه .
بعد كده النكت هاتطلع و تقول مره كان فيه واحد مصرى زى ما بنقول صعيدى عندنا يعنى خلاص أنتو شعب مسخره .
و موضوع غريب كان حصل أن أى حزب أو أى حد بيحاول يعمل تجمهر عند اللجان كان بيطحن بس أشمعنى بأه بتوع حزب الجبهه الديمقراطيه من الأخر الحزب ده مشكوك فى أساسه .
و أوعو أسمع حد بعد كده يلوم الحكومه ديه فى أى حاجه ما يا أغبيا الحكومه ديه من الشعب و أنتو أكتر يعنى لو كان عندكو كرامه كنتو هاتعرفو تخلعوهم لكن أحنا بنكلم مين .
ديه شويه فيديوهات من التزوير ألى حصل قدام عنيكو كلكو و عملتو نفسكو مش واخدين بالكو شوفو تانى علشان تعرفو أن أنتو ملكوش لزمه خليكو كده خساره فيكو تعب القلب خلاص أتخنقنا منكو .
من اليوم أنا مش معارض للحكومه أنا دلوقتى معارض للشعب
يوم بجد غير متوقع أنه ينتهى النهايه السودا ديه طبعا كلنا كنا نازلين و متأكدين أن أغلبنا هايعتقل بس برده نزلنا كنت فى مصر الجديده وركبت تاكسى على الساعه 6 كده علشان ألحق المظاهره ألى المفروووض أنها كانت تبقى فى ميدان التحرير و الدنيا زحمه طبعا فكلمت الناس أطمن عليهم كلمت الأول عمر سيزر و قلتله أستنى متنزلش علشان متتخدش قام قلى لا أنا لازم أنزل فنزل و أتشد المهم طلعت حرب كان زحمه طحن فنزلت أتمشى شويه من عند المول كده للميدان و لما وصلت شفت المنظر المعتاد و ألى أنتو حافظينه لما بتحصل مظاهره عربيات الأمن المرجزى بتحج حولين الحج طلعت حرب فلقيت الناس بتوع الغد واقفين فى البلكونه بيتفرجو كالمعتاد و شفت ناس فى الحزب تحت و ووقفنا فى الشارع علشان نصور الهبل ألى كان بيحصل فحسيت أن الأمن هايبتدى يحور علينا ولاسلكيات أشتغلت تلاقيهم بيقولو فيه تجمع ألحق فض المهم عملنا عبط و مدينا شويه و طلعنا الحزب و هما يادوبك لحقونا على المدخل فجرينا لغايط ما طلعنا المقر و ببص من البلوكنه لاقيت أن المدخل أتحاصر بالعيال بتوع الكاراتيه .
المهم مقر الغد أتحاصر و حاجه تخنق عايز أنزل اشوف الناس جرلهم أيه المهم نزلنا كلنا للمدخل نحاول نخرج و العيال بتوع الكاراتيه دماغهم جزمه أقوله يابنى انا صحفى طلعنى أنا معرفش بتوع الغد دول قام قالى أوامر قلتله نادى الظابط و أقوله نفس الحوار يقوم يقولى زى العسكرى ما قال فزهقت و طلعت فوق تانى أكلم عمر موبايله مقفول أكلم شرقاوى يقوم مأكدلى خبر شد عمر فأتخنقت بجد و واحد بيقولى عربيه الترحليات ألى تحت الحزب فيها مالك و مدحت ننادى محدش فيهم يعبرنا يقوم يجى إيهاب الخولى رئيس الحزب يقولى العيال بيطحنو فى عربيات الترحليلات فخنقنى أكتر و أكتئبت و كنت بجد قربت أعيط و نسمع صريييخ على السلم و ألاقى العيال بتوع الكاراتيه دخلو مدخل العماره و طحنو العيال على السلم وو اح فيهم ماسك ساره بالقلم و خدها نص وشديلها الحجاب و العيال بعدها بتوع الكارتيه جريو و سدوا الباب تانى .
العيال بتوع الغد بيحاولو يطلعو بعد ما أطحنو
بتوع الغد أتخنقو و طلعو البلكونه يرمو كوبيات شاى بلاستك سخنه و جرادل ميه على الظباط و العساكر ليهم حق ما هو طلع دينهم و بعد كده الظابط ألى تحت قال بصوت عالى طب و يا ولاد …… هتباتو فوق النهارده محدش فيكو هايروح يا ولاد الوسخه شوفو أبن الجزمه زعل من شويه ميه و أحنا ألى طلع دين أبونا ضرب المهم جبسونا للساعه 10 بليل و بعد كده إيهاب الخولى عمل أتصالات و أتفق مع الظابط أنهم يطلعونا واحد واحد و نديله وعد أننا هانروح و مش هنروح أعتصام نقابه الصحفيين المهم الظابط طلع عبيط ووافق و طلعونا واحد واحد وروحنا أعتصام نقابه الصحفيين .
المهم رحت عند النقابه ولاقيت العيال بتوع الغد و شويه مدونين وطبعا ممثلين الأشتراكيين موجودين دخلت وقفت معاهم شويه أتخنقت من الشعارات ألى كانو بيقولوها شكلهم كانو فاكرين أن النهارده 25 مارس1970 مش مارس 2007 المهم روحت و كنت مخنوك جدا من الحوار كله فقلت أكتب ألى حصل علشان تتخنقو معايا و شفتو ليه ليه مسمى البلوج ده cruel world
وصلتنى أخبار كده مش متأكد منها أن جورج أسحاق المنسق العام السابق لكفايه مختفى و أخر مره ظهر زى ما مكتوب على موقع كفايه فى بورسعيد و الموبايل بتاعه مغلق و انا قلت أكلمه أتأكد بعد ما عرفت الخبر لاقيت برده موبايله مغلق و الخبر ده نزل على موقع كفايه :
كان من المقرر ان يتواجد أ.جورج إسحق “منسق حركة كفاية العام السابق والمنسق المساعد الحالي “ظهر أمس ببورسعيد لكن فجأة إنقطع هاتفه المحمول عن الإستقبال والإرسال ولم يعرف عنه أي شئ حتى الأن.
جرت عدة محاولات للإتصال بأشقائه في بورسعيد للإطمئنان عليه لكن لم يبد أحد منهم معرفته بمكان تواجده حاولنا الإتصال بالكثير من أعضاء كفاية ببورسعيد وأيضا نفس النتيجة.
يذكر ان المنسق المساعد لم يعرف عنه من قبل أنه يقوم بغلق هاتفه المحمول طيلة ساعات الليل والنهار .
المرجح الأن تعرض منسق كفاية للإختفاء الجبري لكن ليست لدينا أي معلومات عن الجهة المسؤوله عن ذلك .
كل المعلومات التي تتحدث عن الإفراج عنه غير صحيحه وغير مؤكده .
وتدعو الحركة كل نشطائها للتأكيد على عدم خوفهم وعلى عدم إنكسارهم أمام النظام البوليسي القمعي والتواجد غدا في إعتصامات ومظاهرات الحركة في أنحاء مصر المختلفة.
أعتصام بميدان التحرير بالقاهره من الساعه 8 مساء حتى الساعه 12 ظهرا باليوم التالى
أعتصام بالأسكندريه بميدان المنشيه يوم الأثنين من الساعه 9 صباحا حتى الساعه 5 مساء
أنجلترا – أمام السفاره المصريه بلندن من الساعه 12 ظهره حتى الساعه الثالثه
نيويورك أمام القنصليه المصريه وقفه من 12.30 حتى1.30
و قفه أمام سفاره مصر بواشنطون من 11 صباحا حتى الواحده ظهرا
Monday
Another Referendum
More Authoritarianism
RALLY against more Constitutional Constraints on Liberties in Egypt
Join us in Washington, DC in front of the Egyptian Embassy
26 March 07
11am – 1pm
3521 International Court, NW nora.younis@gmail.com - New York
Monday March 26 at Egyptian Consulate
12:30 – 1:30 pm,
1110 Second Avenue, NYC 10022 shehabfakhry@yahoo.com
917-392-9408 -
London Egyptians in London will demonstrate in front of the Egyptian Embassy, Monday 26 March, from 12pm to 3pm, to protest Mubarak’s authoritarian constitutional amendments
The Embassy is located: 26 South Street, London W1K 1DW
أنت طبعا مش عاجبك موضوع التعديل الدستورى ممكن تدوس هنا لو كان عجبك المهم أنا متأكد أنك دلوقتى فقدت الأمل و بتقول لنفسك يعنى هاتفرق لو رحت التصويت على الأستفتاء أو مرحتش ما الحوار كله مطبوخ و كده كده بيعملو ألى فى دماغهم لا أستنى أنا مش متفق معاك فى الحوار ده أنت لازم تروح للتصويت و تقول لا مش بس كده أنت لازم تخلى الناس ألى حوليك يروحو و يقولو لا كفايه السلبيه ألى أحنا عايشيين فيها ديه مش عيب أنك تاخد موقف سياسى ده حقك و محدش يقدر يمنعك من أنك تقول رأيك فى موضوع التعديلات الدستوريه بص للشباب فى فرنسا بيعملو ايه هاتقولى هناك فيه حريه و هنا مفيش أنا هاقولك أنهم ألى أدو الحريه ديه انفسهم مش الحكومه ألى أدتهلهم و التاريخ يشهد لازم أحنا الشباب ألى نغير لو أبهتنا كانو سلبيين و خايفيين و دفنو دماغهم فى الرمله أحنا مش زيهم و مش هانسكت مش بقولك روح أعمل مظاهره ولا أعمل اضراب أنا بقولك مارس حقك الطبيعى كبنى ادم ليه رأى و ليه وجهه نظر و ليه تخلى غيرك هو ألى يحدد مصيرك هو أنت عاجز ولا جبان ما تيجو نثبتلهم أننا مش زى الجيل ألى فات و نستغل أى حق شرعى مسوح لينا و نروح و نقول لا أحنا ضد المقاطعه علشان المقاطعه جبن حتى لو النتيجه هاتزهور يبقى عملنا ألى علينا و تزورتش و أحنا عاملين عبط و أنا متأكد أننا مش عبط ولا هناخد على قفانا أنا زيى زيك واحد عايز هو ألى يقرر مصيره .
ما تيجو الفتره الجايه ألى هى من الجمعه ليوم الأتنين نعمل شويه حجات هى حجات سهله و مش صعبه على أى حد و هاتفرق مع مستقبلنا كتير :
1 – أتكلم مع صحابك و لو أقتنعت بكلامى ما تعرضه عليهم و أتناقشو ده حقكو .
2 – مش هاتفرق كتير لو بعت مثلا خمس رسايل من موبايلك و كتبت فيها ” مش عايزيين تعديل دستور – روح و مارس حقك كأنسان ليه رأى كأنسان موجود مش ميت و قول لا لتعديل الدستور – برجاء تمرير الرساله بقدر المستطاع لأصحابك ألى هما برده من حقهم يقولو رأيهم “
3 – مش صعبه لو مررت الأيميل ده لكل صحابك عملتله فورورد .
4 – ممكن لو تعرف تنقل بقدر أستطاعتك نمر التليفونات ألى على موبايلك بدون اسماء أرقام فقط فى ملف تكست “TXT” و تبعته علىmesh3aizen@gmail.comعلشان يوم الأتنين الصبح هانبعت أكتر من 200000 رساله
5 – أخر حاجه و هى أن أنت تروح و تقول مش عايزيين تعديل دستور .
