المؤتمر السنوى الخامس : إشتغالات و إفتكاسات 2008 ” soon “


نحو أنطلاقه جديده هدفها الرقى بمصر و العمل على
إصلاح الوضع الأقتصادى و السياسى المصرى و حول توقعات قرارات المؤتمر السنوى الخامس
للحزب الوطنى ليعرض إنجازاته السابقه و مقترحاته للمستقبل و سيكون هذا المؤتمر فعلا
أنطلاقه لنا نحن المصريين  أنا عن نفسى اليوم ده مش هاسمع منهم أى حاجه و لا أكن
فيه مؤتمر ولا حاجه هما هايملو قاعات المؤتمر بألاف الجنود و موظفيين الشركات و ألى
بياخد 10 جنيه عل نفر و يقوم جايب أبوه و أمه و أخواته و يقولهم هاخركو عند ماما
سوزان  .. الحزب الوطنى الذى لم يوفى بأى من وعوده لنا نحن المصريين و نثق تماما أن
ليس للحزب الوطنى أى شعبيه من أفراد الشعب ” العاديين ” و أن جميع أصواته نتاج ما
يتم شرائه بأموال رجال الأعمال الذين هم نفسهم نواب الحزب الوطنى فى البرلمان و
الغريبه كمان أنهم هما نفسهم ألى مسيطريين على إقتصاد البلد من حديد و أسمنت و
إتصالات كمان سيراميك وسكر و قمح و … و غيره


و علشان نحس إن البلد بتتحرك بينا يبقى لازم نخرج من
سكوتنا المزمن ده و نرفض الوضع الحالى بالفعل مش بالكلام  فيه مئات الجروبات ألى ضد
سياسه الحزب الوطنى و الأحزاب ضد الحزب الوطنى و معظم المجتمع المدنى فى مصر عباره
عن معارضين للنظام الحالى بس مرتاحوش فى الأحزاب الفاشله الحاليه و قالو نلعب من
حته تانيه .


و بمناسبه الفكر الجديد الذى صمم على أن معارضته
الحاليه هى جماعه الإخوان المسلمين و رئيس حزب شفتو طلع مزور – طبعا الكلام ده مش
مظبوط و جماعه الإخوان المسلميين وصلت للمجلس بهذا العدد طبقا لخطه موضوعه من الحزب
الوطنى ليقنع الغرب بأن بقائه هو السبب فى خمول نشاط الجماعات المتعصبه زى الإخوان
المسلميين و لإحساسه بأن المعونات و الدعم الأجنبى بدأ فى الأتجاه للتيارات
الليبراليه لفقدان الأمل فى النظام الحالى بأن يخطو أى خطوه للأمام  مش خوفا علينا
أكيد لا علشان متحصلش أزمه أقتصاديه تقلب بأزمه سياسيه فى مصر فالمنطقه تنزعج  و
جيرانا مش بيحبو الإزعاج .


لازم
نقف وقفه مصريه و علشان نقدر نعيش كلنا يبقى لازم
حوار السلبيه بتاع أهلنا و عدم المشاركه فى القرار و إحنا مالنا يا بنى ما ألى يحكم
يحكم . .  مش شرط أنه يكون ليا فى السياسه علشان أشارك فى الجو السياسى بتاع بلدى
أنا مواطن عادى مهما كان طبقتى الإجتماعيه كده كده الوضع السياسى و الإقتصادى بيأثر
عليا واحد يقول بدل ما كنت أركب هيونداى دلوقتى ب 60 ألف كان من 7 سنين كان ممكن
أركب بيهم
bm
وواحد تانى لسه متخرج بيتفحت 12 ساعه شغل و بيقبض متوسط 1500 يادوبك يروح الشغل و
يخرج مرتين فى الشهر و أقلب و باقى الشهر يكح شوفو ده لو كان بيقبض نفس المبلغ من 7
سنين ولا العيش دلوقتى 3 أرغفه بجنيه كلنا متأثريين من الغنى للفقير إحنا الشعب
الوحيد ألى بيتحصر على أيام زمان و الزمن الجميل إحنا قلنا كده مش علشان أن الزمن
ده مش هايجى زيه لائه علشان مجاش بعده ايام أحسن منه كل العالم بيقدس زمن المسقبل
علشان هما فى تطور و رفاهيه مستمره يعنى هما بكره أضافه لحضارتهم و عندنا إحنا بسبب
عبطنا بكره ده يوم غلس ملوش ملامح من خلقته هاتقله أيه ألى جابك و هاتتحصر على حالك
أمبارح علشان أنت الدنيا بتتغير حواليك و أنت قاعد و أخرك بتتكلم .

Advertisements

أستفتاء مبارك باطل : ويسقط الشعب المتخلف

و يسقط الشعب المصرى

ألى حصل فى الأستفتاء ده مصيبه و أنا بعترف أنى كنت متخلف لما كنت بدعو الناس تروح تصوت و تقول لا و بصراحه كده كل ألى كان بيدعو الناس أنهم يروحو ويقولو لا برده متخلفين زيى و تحيه لدعاه المقاطعه أنهم نجحوا مع أن الشعب المتخلف بتعنا مقاطع لوحده .

المصيبه ألى أكبر من التزوير أن التزوير كان علنى على عينك يا تاجر مش عارف هى الحكومه ديه أكيد متأكده من أننا كلنا متخلفين يعنى من الأخر هو كده و أعلى خيلكوا أركبوه يعنى من الأخر الشعب ده بأحزابه بجمعيات حقوق الأنسان بباقى البنى أدمين ميساووش تعريفه يعنى من الأخر أنتو ملكوش لزمه .

تخيلو مجرد تخيل مع أنى عارف أن الشعب ده خياله محدود أن موضوع التزوير ده حصل فى أى بلد غير مصر ألى أنتو متستحقوش تكونو منها المهم كان أيه ألى يحصل أكيد أقل حاجه كانت الحكومه كلها أستقالت بس هانقول ايه لشعب جبان زينا .

من الأخر كده المصرى بأه أرخص أنسان فى الوجود يعنى الواحد فينا بالتخلف و الجهل و السلبيه ألى أحنا فيها خلاص فينيتو ملناش لزمه المفروض نعمل أنتحار جماعى و نريح البشريه من الجهل و التخلف ألى أحنا فيه .

بعد كده النكت هاتطلع و تقول مره كان فيه واحد مصرى زى ما بنقول صعيدى عندنا يعنى خلاص أنتو شعب مسخره .

و موضوع غريب كان حصل أن أى حزب أو أى حد بيحاول يعمل تجمهر عند اللجان كان بيطحن بس أشمعنى بأه بتوع حزب الجبهه الديمقراطيه من الأخر الحزب ده مشكوك فى أساسه .

و أوعو أسمع حد بعد كده يلوم الحكومه ديه فى أى حاجه ما يا أغبيا الحكومه ديه من الشعب و أنتو أكتر يعنى لو كان عندكو كرامه كنتو هاتعرفو تخلعوهم لكن أحنا بنكلم مين .

ديه شويه فيديوهات من التزوير ألى حصل قدام عنيكو كلكو و عملتو نفسكو مش واخدين بالكو شوفو تانى علشان تعرفو أن أنتو ملكوش لزمه خليكو كده خساره فيكو تعب القلب خلاص أتخنقنا منكو .

من اليوم أنا مش معارض للحكومه أنا دلوقتى معارض للشعب

عاشت الحكومه ويسقط الشعب المصرى

 

www.honalqahirah.com

  ADD YOUR COMMENTS >>

قريب أوىىىى :

قريب أوى

هـــنــــا الــــقـاهــره

www.honalqahirah.com

جريده ألكترونيه أسبوعيه بس مش زى جرايد الباقيين

حوارتنا مش زى حوارات الناس التانيين

 أول جريده أسبوعيه مرئيه يعنى الخبر عندنا صوت وصوره

و الكلام عندنا جرىء جرىء أوى

هاتطلع كل يوم سبت  أستنونا السبت 7 إبريل 2007

هنا السياسه – هنا الفن – هنا الرياضه – هنا كل الحوارات

Powered by ScribeFire.

مش عايزيين تعديل دستور !!!!!! طب نعمل أيه !!!!!!!!!

أنت طبعا مش عاجبك موضوع التعديل الدستورى ممكن تدوس هنا لو كان عجبك المهم أنا متأكد أنك دلوقتى فقدت الأمل و بتقول لنفسك يعنى هاتفرق لو رحت التصويت على الأستفتاء أو مرحتش ما الحوار كله مطبوخ و كده كده بيعملو ألى فى دماغهم لا أستنى أنا مش متفق معاك فى الحوار ده أنت لازم تروح للتصويت و تقول لا مش بس كده أنت لازم تخلى الناس ألى حوليك يروحو و يقولو لا كفايه السلبيه ألى أحنا عايشيين فيها ديه مش عيب أنك تاخد موقف سياسى ده حقك و محدش يقدر يمنعك من أنك تقول رأيك فى موضوع التعديلات الدستوريه بص للشباب فى فرنسا بيعملو ايه هاتقولى هناك فيه حريه و هنا مفيش أنا هاقولك أنهم ألى أدو الحريه ديه انفسهم مش الحكومه ألى أدتهلهم و التاريخ يشهد لازم أحنا الشباب ألى نغير لو أبهتنا كانو سلبيين و خايفيين و دفنو دماغهم فى الرمله أحنا مش زيهم و مش هانسكت مش بقولك روح أعمل مظاهره ولا أعمل اضراب أنا بقولك مارس حقك الطبيعى كبنى ادم ليه رأى و ليه وجهه نظر و ليه تخلى غيرك هو ألى يحدد مصيرك هو أنت عاجز ولا جبان ما تيجو نثبتلهم أننا مش زى الجيل ألى فات و نستغل أى حق شرعى مسوح لينا و نروح و نقول لا أحنا ضد المقاطعه علشان المقاطعه جبن حتى لو النتيجه هاتزهور يبقى عملنا ألى علينا و تزورتش و أحنا عاملين عبط و أنا متأكد أننا مش عبط ولا هناخد على قفانا أنا زيى زيك واحد عايز هو ألى يقرر مصيره .

ما تيجو الفتره الجايه ألى هى من الجمعه ليوم الأتنين نعمل شويه حجات هى حجات سهله و مش صعبه على أى حد و هاتفرق مع مستقبلنا كتير :

1 – أتكلم مع صحابك و لو أقتنعت بكلامى ما تعرضه عليهم و أتناقشو ده حقكو .

2 – مش هاتفرق كتير لو بعت مثلا خمس رسايل من موبايلك و كتبت فيها ” مش عايزيين تعديل دستور – روح و مارس حقك كأنسان ليه رأى كأنسان موجود مش ميت و قول لا لتعديل الدستور – برجاء تمرير الرساله بقدر المستطاع لأصحابك ألى هما برده من حقهم يقولو رأيهم

3 – مش صعبه لو مررت الأيميل ده لكل صحابك عملتله فورورد .

4 – ممكن لو تعرف تنقل بقدر أستطاعتك نمر التليفونات ألى على موبايلك بدون اسماء أرقام فقط فى ملف تكست “TXT” و تبعته على mesh3aizen@gmail.com علشان يوم الأتنين الصبح هانبعت أكتر من 200000 رساله

5 – أخر حاجه و هى أن أنت تروح و تقول مش عايزيين تعديل دستور .

 clik here to add your Comment »

 

مهزله التعديلات الدستوريه = لن نرحم من يعارض تعديلات التوريث =


Click to join My CRUEL WORLD

بجد ده حوار غريب جدا لما كنت فى المظاهره ألى كان المفروض هاتتعمل بميدان التحرير يوم الخميس 15/3/2007 لاحظت حاجه غريبه جدا هى ان الأمن عايز يمنع أصوات الناس بتوع المظاهره توصل للبشر ألى فى الشارع و كان أى حد عامل سبع رجاله و ماشى بيقول أى حوارات ليها علاقه بالتعديلات الدستوريه كانو بيشلوه و بيرموه فى حاره كده ضيقه جنب حزب التجمع علشان محدش يسمع الهتافات مش مصدقنى طبعا طب شوفو الفيديو ده هتلاقو فيه الأمن بيشيل اكتر من 30 واحد و بيرميهم فى شارع جانبى علشان يهتفو براحتهم من غير ما صوتهم يوصل للبشر ألى ماشيين فى الشارع و مش فاهميين هو فيه ايه !!!!!!!!!!

بجد عبد القدوس كان عاملهم صداع و قفشت معاهم أنهم يعتقلوه و شالوه من بين المتظاهريين و حاولو يخطفوه بس العيال بتوع الأخوان قفشو فى الراجل و مسبهوش شوفو الحوار ده فى الفيديو ده

العسكرى غلبان فى الجيش ياكل عدس و يلبس خيش كلام جميل بس ألى بيقولو الكلام ده فى المظاهره للعساكر ميعرفوش أن العساكر بتوع الأمن المركزى دول اغبى خلق الله و هما أول ما قالو كده للعساكر قام العساكر مسكوهم و طلعو …… عنيهم !!

مش عايزين تعديل دستور أيه بتقولو ايه يا ولاد الكلب أيوه ابعت عساكر عربيه 12 قطاع أمن مركزى جنوب علشان ولاد الكلب هنا بيقولو مش عايزين تعديل دستورى

 

الصحافه فين الرهاب أهوه …. الصحافه هاتعملكو أيه يا فتك ما أنا أضربت معاكو بس العيال خدو عسكرى أسير مظاهره

 

بجد هى ديه الحريه عبر عن رأيك أنت فى بلد حره و بنعملك دستور حر أما أنتو بجد شعب ناكر للجميل هو فيه حريه بعد كده

 

بصو بأه علشان وصلنى إيميلات من الناس ألى مش عارفيين يشغلو الفيديوهات نزلو برنامج فلاش من هنا

و بعدين أعملو setup للبرنامج بعد ما تعملوله دونلود و نصيحه يعنى أستخدمو firefox بدل من internet explorer ودوس هنا علشان تعمل دونلود لل fire fox

و دوس هنا علشان تضيف تعليقك على الموضوع

Click to join myCRUELWORLD

 

مظاهره التحرير : لا للتعديلات الدستوريه : لا لمبارك

Click to join myCRUELWORLD

كان يوم الخميس 15/3 غريب جدا كلنا عارفين أنه كان فيه و قفه أحتجايه دعت إليها كفايه علشان ترفض الهبل ألى بيحصل فى الدستور ده و نزلت علشان أروح أغطى المظاهره زى كتير من المدونين و أنزل التحرير الساعه 4.30 كده الاقى الدنيا مقلوبه أكتر من 2000 عسكرى و بلطجى متوزعين حولين ميدان التحرير و ملقتش ولا واحد من الناس ألى أعرفهم و أدور على المظاهره مفيش قمت راجع حزب الغد علشان اشوف أيه النظام فيه مظاهره ولا مفيش و كان شارع طلعت حرب من التحرير للميدان أتحول لقاعده عسكريه لقوات أخونا العادلى المهم طلعت الحزب و صورت منظر الميدان و هو مليان عربيات أمن مركزى .

ديه صوره لعربيات العدلى و هى محاصره ميدان طلعت حرب

شويه عساكر قدام الغد

و بعد ما صورت الصورتين دول من بلكونه الغد سمعت هتافات جايه من ناحيه حزب التجمع فبصيت كده لا قيت مليشيات البلطجيه حاصرو الناس فى شارع صغير و الشارع ده مالوش مخرج هو ألى بيدخل ميطلعش .

 

 

 

ديه حته من الكوردون ألى حاصر المتظاهرين بجانب حزب التجمع

المهم قلت لازم أعمل عبيط و أدخل الكوردون علشان أشوف أيه الطحن ألى بيحصل جوه ده فقربت كده كده من الكوردون و قلت للعسكرى ” أنت يا ابنى وسع كده ” فقالى حاضر يا باشا فدخلت لاقيت محمد عبد القدوس ماسك الميكروفون بتاعه و عملى يهتف و البلطجه محاصرينه هو و معاه كده يجى 30 واحد من الغد و كفايه و البلطجيه عاملين يضيقو الدايره لغايط ما عبد القدوس فرفس منهم ووقع فى الأرض

عبد القدوس و هو بيهتف ألى حوليه دول مش متظاهرين دول بلطجيه

الراجل مستحملش خنقه الحصار فوقع فجبوه من الجاكيته و دول برده بلطجيه و الله لو مشتوهم عريانين هانعرفهم برده

الطحن أشتغل

عبد القدوس و هو أفش فى العلم كانو عايزيين يخدوه منه أصل ممنوع شيل الأعلام المصريه فى مصر لو علم الأهلى أوك مفيش مشاكل الريس أهلاوى

 

الظابط ألى ماسك فرقه البلطجيه لاقى أن عدد البلطجيه قليل 500 بلطجى على 50 متظاهر عنده حق فمسك الاسلكى و قال أبعت أبعت فعملو كوردون بصف العساكر ده علشان يساعد البلطجيه شويه و الله الناس ديه بتتعب

أنا قلتلكو هما عينهم على عبد القدوس مسكوه و عايزيين يشدوه من وسط المظاهره بس الناس ألى معاه طلعو رجاله و أفشو فيه المهم الراجل ده أطحن

 

صف العساكر ألى طلبه الظابط ألى قلتلكو عليه قبل كده دخل يطحن فى كله فى المتظاهرين و فى البلطجيه ماهم ميعرفوش بعض

 

أيه كل ده ياعم مكنش تعديل دستورى

العيال العساكر قفشو فى واحده ألى لابسه بمبى كانو عايزيين ولا بلاش ….. !!!!!

 

dscf0050.jpg

 

كده واضحه شويه

 

لما شفت المنظر ده قلت خلصت يا هنعتقل أو هايحصل فينا زى ماحصل فى أستفتاء الماده 67 قدام نقابه الصحفيين و بجد بتوع التجمع عملو حركه مش لذيذه قفلو الباب الحديد و سابو الناس تتعجن قدام الحزب شفتو الأحزاب

 

شويه من الطحن ألى كان بيحصل

 

 

 

و ألى أتبقو من الغد بعد ألى أتقبض عليهم جريو و قالو نناضل من البلكونه أحسن يسلام على النضال الليبرالى !!!!

 

بعد الحوارات ديه أنا مش عارف هو فيه أيه ليه كل ده ماتسيب الناس تقول رأيها ولا لازم ألى يقول رأيه يكون زى رأيك و لو مكنش زى رأيك تعتقله و تطحنه برحه شويا علينا ياعم أحنا مش قدك بس برده مش هانسكت و حوار التعديل ده لو هايحصل هايحصل على جثثنا تخيلو أن قبل تفعيل قانون الأرهاب بيحصل فينا أيه فى الشارع بعد بأه قانون الأرهاب يا عينى على قانون الأرهاب هايضربو الناس ألى بيتظاهرو فى الشارع بالنار ليه ياعم تضربهم بالنار دول أرهابيين و نلاقى فى نشره الساعه 9 مقتل زعماء التيار الليبرالى المسلح و التيار الشيوعى المسلح و مليشيات الأخوان و زعيم تيار الوسط أو نسمع مقتل صحفى فى مظاهره كان يدعم التيارات الأرهابيه و الشعب كل هايبقى أرهابيين !!!!!

علشان تشوف كل صور المعجنه دوس على اللينك ده

http://www.flickr.com/photos/7367926@N06/sets/72157600004718422/detail

أنتظر قريبا تغطيه مظاهره لا لطبخ الدستور بالفيديو و نصيحه لو قلبك مش جامد و مش هايستحمل الطحن و الضرب ألى حصل بلاش أحسن

Click to join myCRUELWORLD